ਵਿਦਿਆਲੇ ਦਾ ਟੂਰ

ਵਿਦਿਆਲੇ ਦਾ ਟੂਰ ਗਿਆ ਸੀ।
ਕਈ ਸੌ ਮੀਲਾਂ ਦੂਰ ਗਿਆ ਸੀ।
ਬੈਠੇ ਜਾ ਕੇ ਝੀਲ ਕਿਨਾਰੇ।
ਜਿੱਥੇ ਸੁੰਦਰ ਅਜ਼ਬ ਨਜ਼ਾਰੇ।
ਬਾਗ੍ਹਾਂ ਦੀ ਹਰਿਆਲੀ ਵੇਖੀ।
ਚਹੁੰ ਪਾਸੇ ਖ਼ੁਸ਼ਹਾਲੀ ਵੇਖੀ।
ਹੱਸ-ਹੱਸ ਜਿੱਥੇ ਵਕਤ ਗੁਜ਼ਾਰੇ।
ਜਾ ਕੇ ਬੈਠੇ ਝੀਲ ਕਿਨਾਰੇ।
ਖ਼ੁਸ਼ਬੂਆਂ ਦੀ ਹਸਤੀ ਵੇਖੀ।
ਚਾਰੇ ਪਾਸੇ ਮਸਤੀ ਵੇਖੀ।
ਫੁੱਲ ਖਿੜ੍ਹੇ ਸੀ ਪਿਆਰੇ-ਪਿਆਰੇ।
ਜਾ ਕੇ ਬੈਠੇ ਝੀਲ ਕਿਨਾਰੇ।
ਰਾਤੀਂ ਪਾਣੀ ਜਗ ਮਗ ਜਗਦਾ।
ਬੇੜੀ ਹੇਠਾਂ ਕਿੰਨਾ ਫਬਦਾ।
ਪਾਣੀ ਦੇ ਵਿਚ ਚੰਨ ਸਿਤਾਰੇ।
ਬੈਠੇ ਜਾ ਕੇ ਝੀਲ ਕਿਨਾਰੇ।
ਚੰਗੇ ਲਗਦੇ ਪੰਛੀ ਤਰਦੇ।
ਕਿਣ-ਮਿਣ, ਕਿਣ-ਮਿਣ ਬੱਦਲ ਵਰ੍ਹਦੇ।
ਕੁਦਰਤ ਲੱਖ ਸਵਰਗ ਉਤਾਰੇ।
ਬੈਠੇ ਜਾ ਕੇ ਝੀਲ ਕਿਨਾਰੇ।

-ਬਲਵਿੰਦਰ ਬਾਲਮ ਗੁਰਦਾਸਪੁਰ
ਉਂਕਾਰ ਨਗਰ ਗੁਰਦਾਸਪੁਰ ਪੰਜਾਬ
ਮੋਬਾਈਲ : 98156-25409