ਇੰਡੋਨੇਸ਼ੀਆ ਵਿਚ ਅਚਾਨਕ ਹੜ੍ਹਾਂ ਅਤੇ ਜ਼ਮੀਨ ਖਿਸਕਣ ਕਾਰਨ 174 ਲੋਕਾਂ ਦੀ ਮੌਤ, 79 ਲਾਪਤਾ

ਜਕਾਰਤਾ, 28 ਨਵੰਬਰ - ਇੰਡੋਨੇਸ਼ੀਆ ਦੇ ਆਚੇ, ਉੱਤਰੀ ਸੁਮਾਤਰਾ ਅਤੇ ਪੱਛਮੀ ਸੁਮਾਤਰਾ ਵਿਚ ਹੜ੍ਹਾਂ ਅਤੇ ਜ਼ਮੀਨ ਖਿਸਕਣ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 174 ਹੋ ਗਈ ਹੈ, 79 ਲੋਕ ਅਜੇ ਵੀ ਲਾਪਤਾ ਹਨ । ਇਹ ਜਾਣਕਾਰੀ ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਏਜੰਸੀ ਨੇ ਦਿੱਤੀ ।  ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਏਜੰਸੀ ਦੇ ਮੁਖੀ ਸੁਹਾਰਯੰਤੋ ਨੇ ਇਕ ਪ੍ਰੈਸ ਬ੍ਰੀਫਿੰਗ ਦੌਰਾਨ ਕਿਹਾ ਕਿ ਉੱਤਰੀ ਸੁਮਾਤਰਾ ਵਿਚ ਸਭ ਤੋਂ ਵੱਧ ਮੌਤਾਂ ਹੋਈਆਂ ਹਨ, 116 ਮੌਤਾਂ ਅਤੇ 42 ਲਾਪਤਾ ਹਨ।

ਮਾੜੀਆਂ ਸੜਕਾਂ ਅਤੇ ਵਾਰ-ਵਾਰ ਜ਼ਮੀਨ ਖਿਸਕਣ ਕਾਰਨ ਬਹੁਤ ਸਾਰੇ ਪ੍ਰਭਾਵਿਤ ਖੇਤਰਾਂ ਤਕ ਪਹੁੰਚਣਾ ਮੁਸ਼ਕਿਲ ਹੋ ਗਿਆ ਹੈ, ਜਿਸ ਨਾਲ ਬਚਾਅ ਕਾਰਜ ਹੌਲੀ ਹੋ ਗਏ ਹਨ। ਸ਼ਿਨਹੂਆ ਨਿਊਜ਼ ਏਜੰਸੀ ਦੀ ਰਿਪੋਰਟ ਅਨੁਸਾਰ, ਜ਼ਮੀਨ ਖਿਸਕਣ ਵਾਲੇ ਖੇਤਰਾਂ ਵਿਚ ਹੋਰ ਪੀੜਤ ਹੋ ਸਕਦੇ ਹਨ ਜਿਨ੍ਹਾਂ ਤੱਕ ਪਹੁੰਚਣਾ ਅਜੇ ਵੀ ਔਖਾ ਹੈ। ਆਚੇ ਪ੍ਰਾਂਤ ਵਿਚ, 35 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਗਈ ਹੈ, 25 ਅਜੇ ਵੀ ਲਾਪਤਾ ਹਨ। ਪੱਛਮੀ ਸੁਮਾਤਰਾ ਵਿਚ, 23 ਲੋਕਾਂ ਦੀ ਮੌਤ, 12 ਲਾਪਤਾ ਹਨ । ਹੜ੍ਹਾਂ ਅਤੇ ਜ਼ਮੀਨ ਖਿਸਕਣ ਨਾਲ ਕਈ ਜ਼ਿਲ੍ਹਿਆਂ ਵਿਚ ਸੜਕਾਂ ਅਤੇ ਪੁਲਾਂ ਨੂੰ ਨੁਕਸਾਨ ਪਹੁੰਚਿਆ, ਜਿਸ ਕਾਰਨ ਲਗਭਗ 3,900 ਘਰਾਂ ਨੂੰ ਅਸਥਾਈ ਪਨਾਹ ਲੈਣ ਲਈ ਮਜਬੂਰ ਹੋਣਾ ਪਿਆ।