ਸਭ ਨੂੰ ਪਿਆਰ-ਮੁਬਾਰਕ ਦੇਵਾਂ ਸ਼ੁੱਭ ਅਸੀਸਾਂ ਨਾਲ।
ਘਰ-ਘਰ ਵਿਚ ਮੁਹਬੱਤ ਲੈ ਕੇ ਆਇਆ ਹੈ ਨਵ ਸਾਲ।
ਤੜਕ ਸਵੇਰੇ ਹਰ ਇਕ ਪੰਛੀ ਛੇੜੇ ਇਕ ਤਰੰਨੁਮ।
ਫੁੱਲਾਂ ਦੇ ਵਿਚ ਖ਼ੁਸ਼ਬੂਆਂ ਦਾ ਆਲੀਸ਼ਾਨ ਤਬਸੁਮ।
ਸੁੰਦਰਤਾ ਦੇ ਪਹਿਰਾਵੇ ਵਿਚ ਝੁਕਦੀ ਜਾਏ ਡਾਲ।
ਘਰ-ਘਰ ਵਿਚ ਮੁਹਬੱਤ ਲੈ ਕੇ ਆਇਆ ਹੈ ਨਵ ਸਾਲ।
ਸਰਹੱਦਾਂ 'ਤੇ ਪਹਿਰਾ ਦਿੰਦੇ ਸ਼ਕਤੀਮਾਨ ਸਿਪਾਹੀ।
ਸੂਰਜ ਵਰਗੀ ਦਸਤਕ ਦਿੰਦੇ ਇਹ ਅਲਬੇਲੇ ਰਾਹੀ।
ਫ਼ਰਜ਼ਾਂ ਵਿਚ ਸ਼ਹਾਦਤ ਰਖਦੇ, ਪੈਰਾਂ ਵਿਚ ਭੁਚਾਲ।
ਘਰ-ਘਰ ਵਿਚ ਮੁਹਬੱਤ ਲੈ ਕੇ ਆਇਆ ਹੈ ਨਵ ਸਾਲ।
ਸਚਾਈ ਦੀ ਜਿੱਤ ਦੀ ਸ਼ੁਹਰਤ
ਆਖਿਰ ਜਿੱਤ ਹੈ ਜਾਣੀਂ।
ਦੱਬੀ ਹੋਈ ਚਿੰਗਾਰੀ ਦੀ
ਬਣਨੀ ਇਕ ਕਹਾਣੀ।
ਤੇਜ਼ ਹਵਾਵਾਂ ਅੰਬਰ ਛੂੰਹਦੇ ਭਾਂਬੜ ਦੇਣੇਂ ਬਾਲ।
ਘਰ-ਘਰ ਵਿਚ ਮੁਹਬੱਤ ਲੈ ਕੇ ਆਇਆ ਹੈ ਨਵ ਸਾਲ।
'ਬਾਲਮ' ਦੇਸ਼ ਦੇ ਨਵ ਯੁਵਕਾਂ ਵਿਚ ਇਕ ਕ੍ਰਾਂਤੀ ਆਉਣੀ।
ਬੇਈਮਾਨੀ ਤੇ ਬੇਇਨਸਾਫ਼ੀ ਦੀ ਉਚੀ ਮੰਜ਼ਿਲ ਢਾਹੁਣੀਂ।
ਪਰਿਵਰਤਨ ਦੀ ਨੀਤੀ, ਨੀਅਤ ਬਣ ਜਾਣੀਂ ਏਂ ਢਾਲ।
ਘਰ-ਘਰ ਵਿਚ ਮੁਹਬੱਤ ਲੈ ਕੇ ਆਇਆ ਹੈ ਨਵ ਸਾਲ।
-ਓਂਕਾਰ ਨਗਰ, ਗੁਰਦਾਸਪੁਰ (ਪੰਜਾਬ)
ਮੋਬਾਈਲ : 98156-25409
