ਈ.ਡੀ. ਦੀ ਮਨੀ ਲਾਂਡਰਿੰਗ ਮਾਮਲੇ ਵਿਚ ਮਿਜ਼ੋਰਮ, ਅਸਾਮ, ਗੁਜਰਾਤ ਵਿਚ ਤਲਾਸ਼ੀ

ਨਵੀਂ ਦਿੱਲੀ, 27 ਨਵੰਬਰ (ਏਐਨਆਈ): ਮਿਆਂਮਾਰ ਦੀ ਸਰਹੱਦ ਨਾਲ ਲੱਗਦੇ ਕਸਬੇ ਦੇ ਨੇੜੇ ਆਪਣੀ ਕਿਸਮ ਦੀ ਪਹਿਲੀ ਕਾਰਵਾਈ ਵਿਚ, ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੇ ਮਿਜ਼ੋਰਮ, ਅਸਾਮ ਅਤੇ ਗੁਜਰਾਤ ਵਿਚ ਵੱਖ-ਵੱਖ ਥਾਵਾਂ 'ਤੇ ਤਲਾਸ਼ੀ ਲਈ ਹੈ ।   ਮਨੀ ਲਾਂਡਰਿੰਗ ਰੋਕਥਾਮ ਐਕਟ (ਪੀ.ਐਮ.ਐਲ.ਏ.), 2002 ਦੇ ਉਪਬੰਧਾਂ ਦੇ ਤਹਿਤ, ਮਿਜ਼ੋਰਮ ਦੇ ਆਈਜ਼ੌਲ ਅਤੇ ਚੰਫਾਈ, ਅਸਾਮ ਦੇ ਸ਼੍ਰੀਭੂਮੀ (ਕਰੀਮਗੰਜ) ਅਤੇ ਗੁਜਰਾਤ ਦੇ ਅਹਿਮਦਾਬਾਦ ਵਿਚ ਵੱਖ-ਵੱਖ ਥਾਵਾਂ 'ਤੇ ਤਲਾਸ਼ੀ ਮੁਹਿੰਮ ਚਲਾਈ ਗਈ।

ਈ.ਡੀ. ਨੇ ਮਿਜ਼ੋਰਮ ਪੁਲਿਸ ਦੁਆਰਾ ਨਾਰਕੋਟਿਕ ਡਰੱਗਜ਼ ਐਂਡ ਸਾਈਕੋਟ੍ਰੋਪਿਕ ਸਬਸਟੈਂਸ (ਐਨ.ਡੀ.ਪੀ.ਐਸ.) ਐਕਟ, 1985 ਦੇ ਤਹਿਤ ਦਰਜ ਕੀਤੀ ਗਈ ਐਫ.ਆਈ.ਆਰ. ਦੇ ਆਧਾਰ 'ਤੇ ਜਾਂਚ ਸ਼ੁਰੂ ਕੀਤੀ, ਜਿਸ ਵਿਚ 6 ਵਿਅਕਤੀਆਂ ਤੋਂ 1,41,66,000 ਰੁਪਏ ਦੀ ਕੀਮਤ ਵਾਲੀ 4.724 ਕਿੱਲੋਗ੍ਰਾਮ ਹੈਰੋਇਨ ਜ਼ਬਤ ਕੀਤੀ ਗਈ। ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀਆਂ ਦੇ ਵਿੱਤੀ ਵਿਸ਼ਲੇਸ਼ਣ ਤੋਂ, ਮਿਜ਼ੋਰਮ-ਅਧਾਰਿਤ ਫਰਮਾਂ ਅਤੇ ਗੁਜਰਾਤ-ਅਧਾਰਤ ਫਰਮਾਂ ਵਿਚਕਾਰ ਵਿੱਤੀ ਸੰਬੰਧ ਸਥਾਪਤ ਕੀਤੇ ਗਏ , ਜਿਨ੍ਹਾਂ ਨੇ ਕੈਫੀਨ ਐਨਹਾਈਡ੍ਰਸ ਦੀ ਉਕਤ ਖੇਪ ਖਰੀਦੀ ਸੀ ।