ਜ਼ੀਰਕਪੁਰ ਟ੍ਰੈਫ਼ਿਕ ਪੁਲਿਸ ਨੇ ਮਹਿਲਾ ਦਾ ਗੁਆਚਿਆ ਪਰਸ, ਮੋਬਾਇਲ ਤੇ ਨਕਦੀ ਕੀਤੀ ਵਾਪਸ

​ਜ਼ੀਰਕਪੁਰ (ਮੁਹਾਲੀ), 5 ਜੁਲਾਈ, (ਹੈਪੀ ਪੰਡਵਾਲਾ) - ਇੱਥੋਂ ਦੇ ਦੇ ਸਿੰਘਪੁਰਾ ਚੌਂਕ 'ਤੇ ਤਾਇਨਾਤ ਟ੍ਰੈਫ਼ਿਕ ਪੁਲਿਸ ਦੇ ਏ.ਐੱਸ.ਆਈ. ਅਮਰਜੀਤ ਸਿੰਘ ਤੇ ਏ.ਐੱਸ.ਆਈ. ਪ੍ਰੇਮ ਸਿੰਘ ਨੇ ਸੜਕ 'ਤੇ ਡਿੱਗਿਆ ਇੱਕ ਮਹਿਲਾ ਦਾ ਪਰਸ ਵਾਪਸ ਕਰ ਇਮਾਨਦਾਰੀ ਦੀ ਮਿਸ਼ਾਲ ਪੇਸ਼ ਕੀਤੀ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਏ.ਐੱਸ.ਆਈ. ਅਮਰਜੀਤ ਸਿੰਘ ਨੇ ਦੱਸਿਆ ਕਿ ਉਹ ਰੋਜ਼ਾਨਾ ਦੀ ਤਰ੍ਹਾਂ ਅੰਬਾਲਾ-ਚੰਡੀਗੜ੍ਹ ਮੁੱਖ ਮਾਰਗ 'ਤੇ ਸਥਿਤ ਸਿੰਘਪੁਰਾ ਚੌਂਕ 'ਤੇ ਆਪਣੀ ਡਿਊਟੀ ਨਿਭਾਅ ਰਹੇ ਸਨ। ਇਸ ਦੌਰਾਨ ਉਨ੍ਹਾਂ ਨੂੰ ਸੜਕ 'ਤੇ ਪਿਆ ਇਕ ਪਰਸ ਮਿਲਿਆ। ਜਦੋਂ ਪਰਸ ਨੂੰ ਖੋਲ੍ਹ ਕੇ ਦੇਖਿਆ ਗਿਆ ਤਾਂ ਉਸ ਵਿਚ ਇਕ ਮੋਬਾਇਲ ਫੋਨ, ਨਕਦੀ ਤੇ ਦਸਤਾਵੇਜ਼ ਸਨ। ਉਨ੍ਹਾਂ ਪਰਸ ਨੂੰ ਆਪਣੇ ਕੋਲ ਰੱਖ ਲਿਆ ਅਤੇ ਇਸ ਦੇ ਅਸਲ ਮਾਲਕ ਦੀ ਉਡੀਕ ਕਰਨ ਲੱਗੇ। ਉਨ੍ਹਾਂ ਦੱਸਿਆ ਕਿ ਕੁੱਝ ਸਮੇਂ ਬਾਅਦ ਪਰਸ ਦੀ ਭਾਲ ਕਰਦੇ ਹੋਏ ਇਕ ਮਹਿਲਾ ਤੇ ਇਕ ਨੌਜਵਾਨ ਉਨ੍ਹਾਂ ਕੋਲ ਪਹੁੰਚੇ। ਮਹਿਲਾ ਵਲੋਂ ਪਰਸ 'ਚ ਪਏ ਸਾਮਾਨ ਦੀ ਸਹੀ ਸ਼ਨਾਖ਼ਤ ਕਰਨ 'ਤੇ ਸਾਰਾ ਸਾਮਾਨ ਸੁਰੱਖਿਅਤ ਵਾਪਸ ਕਰ ਦਿੱਤਾ। ਪਰਸ ਮਿਲਣ 'ਤੇ ਸਰੋਜ ਕੁਮਾਰੀ ਵਾਸੀ ਪਟਿਆਲਾ ਨੇ ਪੁਲਿਸ ਮੁਲਾਜ਼ਮਾਂ ਦਾ ਧੰਨਵਾਦ ਕੀਤਾ।