ਖਾਟੂ ਸ਼ਿਆਮ ਮੱਥਾ ਟੇਕਣ ਗਏ ਡੇਰਾਬੱਸੀ ਦੇ 5 ਨੌਜਵਾਨਾਂ ਦੀ ਕਾਰ ਹਾਦਸੇ ਦਾ ਸ਼ਿਕਾਰ, 2 ਨੌਜਵਾਨਾਂ ਦੀ ਮੌਤ-2 ਗੰਭੀਰ ਜ਼ਖ਼ਮੀ

ਡੇਰਾਬੱਸੀ (ਮੁਹਾਲੀ), 22 ਜੁਲਾਈ (ਗੁਰਮੀਤ ਸਿੰਘ) - ਰਾਜਸਥਾਨ ਦੇ ਸੀਕਰ ਜ਼ਿਲ੍ਹੇ ਵਿੱਚ ਖਾਟੂ ਸ਼ਿਆਮ ਜੀ ਦੇ ਦਰਸ਼ਨ ਕਰਕੇ ਸਾਲਾਸਰ ਬਾਲਾਜੀ ਜਾ ਰਹੇ ਡੇਰਾਬੱਸੀ ਦੇ ਪੰਜ ਨੌਜਵਾਨਾਂ ਦੀ ਇਨੋਵਾ ਕਾਰ ਬੁੱਧਵਾਰ ਦੁਪਹਿਰ ਇਕ ਭਿਆਨਕ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਈ। ਇਸ ਦਰਦਨਾਕ ਹਾਦਸੇ ਵਿਚ ਡੇਰਾਬੱਸੀ ਦੇ ਦੋ ਨੌਜਵਾਨਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਿਨ੍ਹਾਂ ਦੀ ਪਛਾਣ 35 ਸਾਲਾਂ ਸਚਿਨ ਮੱਗੁ ਉਰਫ ਮਿੱਠੂ ਪੁੱਤਰ ਬਲਬੀਰ ਮੱਗੂ ਅਤੇ 40 ਸਾਲਾਂ ਚੰਦਰ ਭਾਨ ਵਾਸੀ ਡੇਰਾਬੱਸੀ ਦੇ ਰੂਪ ਵਿਚ ਹੋਈ ਹੈ। ਚੰਦਰ ਭਾਨ ਡੇਰਾਬੱਸੀ ਵਿਖੇ ਝਾਂਸੀ ਗੋਲਗੱਪੇ ਵਾਲ਼ੇ ਦੇ ਨਾਂਅ ਤੋਂ ਮਸ਼ਹੂਰ ਸੀ। ਖਬਰ ਮਿਲਦੇ ਹੀ ਡੇਰਾਬੱਸੀ ਵਿੱਚ ਸੋਗ ਦੀ ਲਹਿਰ ਦੋੜ ਪਈ। ਇਨ੍ਹਾ ਦੇ ਦੋ ਸਾਥੀ ਅਨਮੋਲ ਸ਼ਰਮਾ ਅਤੇ ਰਾਜੇਸ਼ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਏ, ਜਦਕਿ 25 ਸਾਲਾਂ ਨਿਖਿਲ ਨੂੰ ਕੋਈ ਸਟ ਨਹੀਂ ਲਗੀ।