ਹੈਦਰਾਬਾਦ ਹਾਊਸ ਤੋਂ ਬਾਅਦ ਪੁਤਿਨ ਅਤੇ ਮੋਦੀ ਨੇ 'ਇੰਡੀਆ ਰੂਸ ਬਿਜ਼ਨੈਸ ਫੋਰਮ ਨੂੰ ਵੀ ਸੰਬੋਧਨ ਕੀਤਾ | ਪੁਤਿਨ ਨੇ ਭਾਰਤ ਨਾਲ ਵਪਾਰ ਸੰਭਾਵਨਾ ਵਧਾਉਣ ਦੇ ਸੰਕੇਤ ਦਿੰਦਿਆਂ ਕਿਹਾ ਕਿ ਉਹ ਸਿਰਫ ਤੇਲ ਅਤੇ ਗੈਸ 'ਤੇ ਗੱਲ ਕਰਨ ਜਾਂ ਸੌਦੇ ਕਰਨ ਭਾਰਤ ਨਹੀਂ ਆਏ, ਸਗੋਂ ਰੂਸ ਭਾਰਤ ਦੇ ਨਾਲ ਹਰ ਖੇਤਰ 'ਚ ਸੰਬੰਧ ਅਤੇ ਵਪਾਰ ਵਧਾਉਣਾ ਚਾਹੁੰਦਾ ਹੈ | ਪੁਤਿਨ ਨੇ ਮੋਦੀ ਨਾਲ ਆਪਣੀ ਨਿੱਜੀ ਗੱਲਬਾਤ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਉਨ੍ਹਾਂ (ਮੋਦੀ) ਨੇ ਕਈ ਵਾਰ ਕਿਹਾ ਕਿ ਭਾਰਤ 'ਚ ਕਈ ਸੈਕਟਰਾਂ 'ਚ ਵੱਡੀਆਂ ਸੰਭਾਵਨਾਵਾਂ ਹਨ, ਇਸੇ ਕਾਰਨ 'ਬਿਜ਼ਨੈਸ ਫੋਰਮ' ਦਾ ਆਯੋਜਨ ਕੀਤਾ ਗਿਆ, ਤਾਂ ਜੋ ਨਵੇਂ ਖੇਤਰਾਂ 'ਚ ਸਾਂਝੇਦਾਰੀ ਵਧਾਈ ਜਾ ਸਕੇ | ਪੁਤਿਨ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਅਤੇ 'ਮੇਕ ਇਨ ਇੰਡੀਆ' ਪਹਿਲਕਦਮੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਨ੍ਹਾਂ ਨੀਤੀਆਂ ਕਾਰਨ ਭਾਰਤ ਨੂੰ ਆਰਥਿਕ ਸਫ਼ਲਤਾ ਮਿਲੀ ਹੈ ਅਤੇ ਉਹ ਤਕਨੀਕੀ ਤੌਰ 'ਤੇ ਆਤਮ ਨਿਰਭਰ ਹੋ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਰੂਸੀ ਕੰਪਨੀਆਂ ਭਾਰਤ ਤੋਂ ਵੱਖ-ਵੱਖ ਤਰ੍ਹਾਂ ਦੇ ਸਾਮਾਨ ਅਤੇ ਸੇਵਾਵਾਂ ਦੀ ਖਰੀਦ ਵਧਾਉਣ ਨੂੰ ਤਿਆਰ ਹਨ |
