ਲੋਹੀਆਂ-ਕਾਲਾ ਸੰਘਿਆ ਸੜਕ ’ਤੇ ਹਾਦਸਾ, ਪਤੀ ਦੀ ਮੌਤ, ਪਤਨੀ ਦੀ ਬਾਂਹ ਕੱਟੀ ਗਈ

ਲੋਹੀਆਂ ਖ਼ਾਸ, 30 ਸਤੰਬਰ (ਗੁਰਪਾਲ ਸਿੰਘ ਸ਼ਤਾਬਗੜ੍ਹ) - ਲੋਹੀਆਂ ਤੋਂ ਜਲੰਧਰ ਜਾ ਰਹੇ ਮੋਟਰਸਾਈਕਲ ਸਵਾਰ ਦਾ ਸਾਹਮਣੇ ਤੋਂ ਆ ਰਹੀ ਕਾਰ ਨਾਲ ਏਨੀ ਭਿਆਨਕ ਤੇ ਦਰਦਨਾਕ ਟੱਕਰ ਹੋ ਗਈ ਕਿ ਮੋਟਰਸਾਈਕਲ ਚਾਲਕ ਪਤੀ ਦੀ ਮੌਕੇ ’ਤੇ ਹੀ ਮੌਤ ਹੋ ਜਾਣ ਅਤੇ ਪਤਨੀ ਦੀ ਬਾਂਹ ਕੱਟੀ ਜਾਣ ਦੀ ਅਤਿ ਦੁਖਦਾਈ ਖ਼ਬਰ ਪ੍ਰਾਪਤ ਹੋਈ ਹੈ । ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਆਤਮਾ ਸਿੰਘ ਸੌਂਦ ਨੇ ਦੱਸਿਆ ਕਿ ਉਨ੍ਹਾਂ ਦਾ ਸ਼ਾਗਿਰਦ ਗੁਰਬਚਨ ਸਿੰਘ ਪੁੱਤਰ ਚੇਤ ਰਾਮ ਸਿੰਘ ਹਾਲ ਵਾਸੀ ਲੋਹੀਆਂ ਖਾਸ, ਜੋ ਸ਼ਹਿਰ ਵਿਚ ਹੀ ’ਤੇ ਵਰਕਸ਼ਾਪ ਚਲਾ ਰਿਹਾ ਸੀ, ਜੋ ਲੋਹੀਆਂ ਤੋਂ ਆਪਣੇ ਮੋਟਰਸਾਈਕਲ ’ਤੇ ਪਰਿਵਾਰ ਨਾਲ ਵਾਇਆ ਕਾਲਾ ਸੰਘਿਆ ਜਲੰਧਰ ਜਾ ਰਿਹਾ ਸੀ ਕਿ ਪਿੰਡ ਨਿੱਝਰਾਂ ਦੇ ਗੇਟ ਤੋਂ ਪਿੱਛੇ ਅਚਾਨਕ ਸਾਹਮਣੇ ਤੋਂ ਆ ਰਹੀ ਕਾਰ ਨਾਲ ਟਕਰਾਅ ਗਿਆ । ਉਨ੍ਹਾਂ ਦੱਸਿਆ ਕਿ ਭਾਈ ਗੁਰਬਚਨ ਸਿੰਘ (40) ਜੋ ਰਾਗੀ ਵੀ ਸੀ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦਕਿ ਪਿੱਛੇ ਬੈਠੀ ਉਨ੍ਹਾਂ ਦੀ ਪਤਨੀ ਸਿਮਰਨ ਕੌਰ ਦੀ ਬਾਂਹ ਕੱਟ ਕੇ ਸਰੀਰ ਨਾਲੋਂ ਵੱਖ ਹੋ ਗਈ । ਪੁਲਿਸ ਥਾਣਾ ਲਾਂਬੜਾ ਵਿਖੇ ਸੂਚਨਾ ਦੇ ਦਿੱਤੀ ਗਈ ਹੈ ।