ਸਾਨੂੰ ਆਰਟੀਫਿਸ਼ਲ ਇੰਟੈਲੀਜੈਂਸ ਤੋਂ ਘਬਰਾਉਣ ਦੀ ਲੋੜ ਨਹੀਂ : ਵਿਸ਼ਾਲ ਭਾਰਦਵਾਜ

ਪਣਜੀ, 24 ਨਵੰਬਰ (ਪੀਟੀਆਈ): ਫਿਲਮ ਨਿਰਮਾਤਾ ਵਿਸ਼ਾਲ ਭਾਰਦਵਾਜ ਦਾ ਮੰਨਣਾ ਹੈ ਕਿ ਆਰਟੀਫਿਸ਼ਲ ਇੰਟੈਲੀਜੈਂਸ (ਏਆਈ) ਇਥੇ ਰਹਿਣ ਲਈ ਹੈ ਅਤੇ ਕਿਸੇ ਨੂੰ ਇਸ ਤੋਂ "ਡਰਨਾ" ਨਹੀਂ ਚਾਹੀਦਾ, ਸਗੋਂ ਇਸਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਵਰਤਣਾ ਸਿੱਖਣਾ ਚਾਹੀਦਾ ਹੈ। ਸ਼ੁੱਕਰਵਾਰ ਨੂੰ ਕੌਮਾਂਤਰੀ ਫਿਲਮ ਫੈਸਟੀਵਲ ਆਫ਼ ਇੰਡੀਆ (ਆਈਐਫਐਫਆਈ) ਵਿਖੇ ਸਾਲਾਨਾ ਲਤਾ ਮੰਗੇਸ਼ਕਰ ਯਾਦਗਾਰੀ ਭਾਸ਼ਣ ਵਿਚ ਬੋਲਦਿਆਂ, ਫਿਲਮ ਨਿਰਮਾਤਾ ਨੇ ਕਿਹਾ ਕਿ ਏਆਈ ਕਦੇ ਵੀ ਭਾਵਨਾਵਾਂ ਨੂੰ ਮਹਿਸੂਸ ਕਰਨ ਦੇ ਯੋਗ ਨਹੀਂ ਹੋਵੇਗਾ।

ਉਨ੍ਹਾਂ ਕਿਹਾ,"ਸਾਨੂੰ ਇਸ ਤੋਂ ਡਰਨਾ ਨਹੀਂ ਚਾਹੀਦਾ ਅਤੇ ਇਸਨੂੰ ਤਿਆਗਣਾ ਵੀ ਨਹੀਂ ਚਾਹੀਦਾ। ਏਆਈ ਕਦੇ ਵੀ ਪਿਆਰ ਵਿਚ ਨਹੀਂ ਪੈ ਸਕੇਗਾ। ਇਹ ਕਦੇ ਵੀ ਮੌਤ ਅਤੇ ਪਿਆਰ ਨੂੰ ਮਹਿਸੂਸ ਨਹੀਂ ਕਰ ਸਕੇਗਾ। ਦਿਲ ਤੇ ਭਾਵਨਾਵਾਂ ਸਾਡੀਆਂ ਹੀ ਰਹਿਣਗੀਆਂ। ਇਸ ਲਈ ਜਲਦੀ ਜਾਂ ਬਾਅਦ ਵਿਚ ਸਾਨੂੰ ਪਤਾ ਲੱਗ ਹੀ ਜਾਵੇਗਾ ਕਿ ਇਸਨੂੰ ਕਿਵੇਂ ਵਰਤਣਾ ਹੈ ਅਤੇ ਕਿਵੇਂ ਨਹੀਂ ਵਰਤਣਾ,"

ਸੰਗੀਤਕਾਰ-ਫਿਲਮ ਨਿਰਮਾਤਾ ਨੇ ਯਾਦ ਕੀਤਾ ਕਿ ਕਿੰਨੇ ਲੋਕ ਅਕਸਰ ਤਕਨੀਕੀ ਤਬਦੀਲੀਆਂ ਤੋਂ ਘਬਰਾ ਜਾਂਦੇ ਹਨ। ਉਨ੍ਹਾਂ ਕੰਪਿਊਟਰਾਂ ਦੀ ਉਦਾਹਰਣ ਦਿੱਤੀ ਕਿ ਇਕ ਲਹਿਰ ਸੀ ਕਿ ਕੰਪਿਊਟਰ ਸਾਰਿਆਂ ਨੂੰ ਹਟਾ ਦੇਣਗੇ। ਹੁਣ ਕੀ ਅਸੀਂ ਕੰਪਿਊਟਰਾਂ ਤੋਂ ਬਿਨਾਂ ਜ਼ਿੰਦਗੀ ਬਾਰੇ ਸੋਚ ਸਕਦੇ ਹਾਂ? ਨਹੀਂ, ਅਸੀਂ ਸੋਚ ਵੀ ਨਹੀਂ ਸਕਦੇ, ਕਿਉਂਕਿ ਅਸੀਂ ਤਰੱਕੀ ਨਾਲ ਲੜ ਨਹੀਂ ਸਕਦੇ। ਫਿਲਮ "ਕਾਂਤਾਰਾ" ਦੇ ਸੰਗੀਤਕਾਰ ਬੀ ਅਜਨੀਸ਼ ਲੋਕਨਾਥ, ਜੋ ਕਿ ਸੈਸ਼ਨ ਦਾ ਹਿੱਸਾ ਵੀ ਸਨ, ਨੇ ਕਿਹਾ ਕਿ ਇਹ ਵਿਅਕਤੀਆਂ ਦੀ ਪਸੰਦ 'ਤੇ ਨਿਰਭਰ ਕਰਦਾ ਹੈ ਕਿ ਏਆਈ ਦੀ ਵਰਤੋਂ ਕਰਨੀ ਹੈ ਜਾਂ ਨਹੀਂ।